Teknisk informasjon om i18n.skulelinux.no
På i18n.skulelinux.no prøver me òg ut teknikkar for ulike
språkutgåver av nettsidene. Dei nettsidene som finst på både bokmål og
nynorsk har namn som index.html.nb og index.html.nn.
I nettlesaren oppgir du berre index.html, og så får du
servert sida på det språket du føretrekk:
- Dersom du har oppgitt i nettlesaren at du føretrekk anten
nynorsk (nn) eller bokmål (nb), får du det språket du vil ha.
(Dersom sida finst på det språket. Viss ikkje, kjem sida på
sidemål.) Dette skjer ved hjelp av språkforhandlingsfunksjonane
til Apache.
- Dersom nettlesaren ikkje oppgir verken nynorsk eller bokmål
(men eit anna språk, til dømes engelsk (en) som er standardinnstillinga
i mange nettlesarar, eller norsk (no)), vert språkvalet gjort ut frå
kva for adresse du har nytta for å nå sida. i18n.skolelinux.no
gir bokmål, medan i18n.skulelinux.no gir nynorsk.
HTTP-feilmelding 406
er overstyrt slik at me kan gjera eit intelligent
val i staden for at brukaren skal måtta velja målform sjølv.
PHP-skriptet som handterer feilen kan du sjå i CVSweb.
- Dersom nettlesaren ikkje oppgir språk i det heile, avgjer
Apache språket ut frå LanguagePriority-direktivet.
Dette har verdien'nb nn' for i18n.skolelinux.no og
'nn nb' for i18n.skulelinux.no.
Dei sidene som finst på begge språka må innehalda nett den same
informasjonen. Ordlister, språkreglar og anna som er spesifikt for
eitt språk skal liggja i eigne underkatalogar (http://i18n.skulelinux.no/nb/
og http://i18n.skulelinux.no/nn/).
Her treng det ikkje finnast parallellutgåver.
Dersom ei nettside til dømes berre finst på bokmål, vil òg
nynorskbrukarar få servert bokmålsutgåva. Korleis det fungerer, kan du
prøva med sidene ansvarleg.html (finst
berre på nynorsk) og svn-123.html (berre
bokmål). Ein nynorskbrukar som absolutt vil sjå bokmålsutgåva av til dømes
index.html, kan eksplisitt oppgi adressa
index.html.nb.